الموقع الإلكتروني - موقع إلكتروني

مشكلة كبيرة جدا إنك تصرف وقت ومجهود وفلوس على موقعك الإلكتروني مبيحققش المطلوب منه، وكل النتايج بتقول إن زوار الموقع ده بيهربوا منه بسرعة ومش بيقوموا باللي المفروض يقوموا بيه أثناء وجودهم على موقعك.

تفتكر ازاي هتقدر تحقق مبيعات أو تبني جمهور كبير للبراند بتاعك من خلال الموقع الإلكتروني بتاعك وهو أصلا مبيجلوش أي زوار؟

في المقالة دي حاولنا نجمع لك أكتر 10 أسباب ممكن تخلي أي زائر لموقعك يفضل إنه يهرب منه ويروح لموقع تاني بدل ما يكمل رحلته جوا موقعك.

  • بطىء التحميل

بطىء التحميل هو المشكلة رقم 1 في كل الإحصائيات اللي بتتكلم عن سبب هروب الزوار من موقع إلكتروني معين.

أي زائر في العالم وسط مليون اختيار تاني غير موقعك، مش هيقدر يستنى أكتر من 3 ثواني قصاد موقعك وهو لسه بيحمل.

حاول تختار قوالب وأكواد تسهل من عملية التحميل في موقعك، عشان متفقدش الزوار بسهولة من أول لحظة.

  • زحمة الإعلانات

مفيش شك إن الإعلانات مصدر مهم من مصادر الدخل لأي موقع إلكتروني، ولكن الزوار مش هيفهموا ده بسهولة.

لازم توازن بين المحتوى الهادف في موقعك وما بين وجود الإعلانات

ولازم كمان تختار المكان المناسب لوضع الإعلانات دي جوا موقعك عشان متسببش لغبطة أو ملل للزوار.

  • الطلبات المفاجئة والكتيرة

كام مرة دخلت موقع وبعد كام دقيقة بس قررت تقفله وتتحول لموقع تاني

كان السبب كتر الإلحاح من الموقع على تنفيذ طلب معين أو اتخاذ خطوة معينة.

اي زائر لموقعك مش متوقع منك إنك تلح عليه في حاجة معينة

ولا إنك تطلب منه إجراء خطوة معينة عشان يقدر يكمل رحلته جوا موقعك، لو حصل ده هيكون الخروج برا الموقع هو قراره.

  • الفيديوهات والأصوات المزعجة

عايز اقولك حقيقة مرّة، 90% من زوار المواقع الإلكترونية بيعتقدوا إن الفيديوهات والأصوات اللي بتشتغل تلقائيا معاهم أول ما بيدخلوا الموقع هي شئ مزعج جدا ومؤذي بالنسبة لهم.

  • التصيم الداخلي للموقع

أكيد إنت مش هتختلف معايا في إن تناسق الألوان وبساطة التصميم

وكمان ملائمة ده كله مع هدف ورؤية البراند بتاعك، هيكون سبب قوي في جذب زوار جدد للموقع بتاعك وتشجيع ليهم إنهم يكملوا جواه لأطول فترة ممكنة.

  • اللينكات الوهمية

ممكن توصف لي شعورك لو دخلت موقع إلكتروني ولقيت لينك مهم جدا بالنسبة لك، وأول ما دوست على اللينك ده دخلت في مكان أو صفحة تانية خالص؟

نفس اللي حسيت بيه دلوقتي هو اللي هيحس بيه اي حد هيدخل موقعك ويحصل معاه الموقف ده

علشان كده لازم تكون وفي بوعدك للزائر ومتحاولش تخدعه بلينكات وهمية.

  • ضعف المحتوى

ضعف المحتوى في الموقع يندرج تحته نقط كتير زي الأخطاء الإملائية، أو الأخطاء النحوية وكمان التنسيق في الجمل.

أتأكد قبل نشر أي محتوى جديد على موقعك إنه خالي من أي أخطاء إملائية أو نحوية

وكمان راجع التنسيقات كويس اوي قبل النشر، عشان تحافظ على وجود الزائر أطول فترة ممكنة على موقعك.

  • محتوى قديم

الدنيا من حوالينا بتتغير وبتطور بسرعة أوي، عشان كده أيا كان مجال شغلك لازم تكون متابع كويس جدا اللي بيحصل حواليك.

المحتوى لو مكنش موجود في الوقت المناسب بالظبط هيعتبر قديم، وده هيجبر الزوار انهم يسيبوا موقعك ويدوروا على موقع تانى يكون فيه محتوى أحدث من الموجود عندك.

  • موقع غير ملائم للموبايل

خليني اقولك سر صغير، أنا بكتبلك المقالة دي من على موبايلي مش اللاب توب بتاعي حالياً.

نسبة مستخدمي الإنترنت من خلال الموبايل بتزيد في كل لحظة، ولو كنت مش مدرك الحقيقة دي فدي في حد ذاتها كارثة.

لازم تظبط موقعك إنه يكون ملائم لمستخدمي الموبايل، وده عشان تقدر تجذب أكبر عدد ممكن من المهتمين بالمجال بتاعك.

  • قلة المعلومات ووسائل الاتصال

لازم تحسس الزائر إنك جمبه دايماً، وده هيحصل لما تزوده بكل المعلومات اللي هو محتاج يعرفها عنك

وكمان تنشر وسائل الاتصال بيك في أماكن واضحة في موقعك.

دي كانت أهم 10 أسباب من وجهة نظري تخلي الزوار يهربوا من موقعك الإلكتروني، وميكملوش رحلتهم جواه

قولي أنهي غلطة فيهم موجودة على موقعك لحد دلوقتي؟

 

LEAVE A REPLY

Please enter your comment!
Please enter your name here