الموقع الإلكتروني - موقع إلكتروني

الصفحات الرئيسية في موقعك الإلكتروني تعتبر فرصة كويسة جدا لتمييز الموقع ده على مستوى محركات البحث، من خلال الاهتمام بجودتها وقوتها في العرض تقدر تعلي من ترتيب الموقع في محركات البحث المختلفة

الصفحات الرئيسية في أي موقع إلكتروني هي عبارة عن الصفحات اللي بتتكلم فى موضوع واحد بس بطريقة متشعبة وعميقة جدا، وده من خلال عمل مواضيع فرعية مترابطة ومرتبطة بالموضوع الأساسي اللي بيتكلم عنه الموقع.

في المقالة دي هتكلم معاك عن 5 أفكار لو نفذتها تقدر تحسن من جودة والتفاعل مع الصفحات الرئيسية على موقعك الإلكتروني

  • اختار المكان الصح لمحتوى صفحتك الرئيسية:

بعد ما عملت محتوى صفحتك الرئيسية على الموقع

لازم تهتم جدا إنك تحطها في مكان سهل الوصول إليه بالنسبة للزوار في الموقع.

ممكن باستخدام call to action معين ترشد الزائر لمحتوى الصفحة الرئيسية بتاعتك وتدفعه إنه يلاقيه ويتعامل معاه بمنتهى البساطة.

وممكن تعمل حاجة مفيدة أكتر

هو إنك تحط صفحتك الرئيسية على الموقع ضمن القائمة الرئيسية اللي بتظهر للزائر أول ما بيدخل موقعك بحيث إنه يلاقيها بسهولة وميضيعش وقت في البحث عنها.

  • تضمين اختيار “الذهاب إلى الأعلى” في نهاية الصفحة

معروف إن محتوى الصفحة الرئيسية للموقع بيكون طويل نوعا ما

عشان كده لازم يكون في آخر الصفحة اختيار الذهاب إلى الأعلى عشان تسهل على الزائر إنه يرجع لأول الصفحة مرة تانية، بدل ما يحس بالملل ويقفل الموقع كله.

  • فتح اللينكات في صفحات جديدة:

دايما محتوى الصفحة الرئيسية بيكون عميق ومتشعب، وبيكون فيه مجموعة من اللينكات الفرعية اللي بتوصل لمواضيع تانية مرتبطة بالموضوع الأساسي للصفحة أو الموقع بتاعك.

لو إن كل لينك موجود في الصفحة الرئيسية ممكن يتفتح في صفحة مستقلة جديدة، فده معناه إن الزائر مش هيكون مضطر إنه يقفل الصفحة الرئيسية عشان يتعامل مع اللينك الفرعي وده هيخليه موجود على الصفحة الرئيسية لأطول فترة ممكنة.

  • قسم محتوى الصفحة الرئيسية بشكل جذاب

محتوى الصفحة الرئيسية زي ما اتفقنا إنه بيكون كبير نسبيا، عشان كده لازم توزعه بشكل جذاب وغير ممل بالنسبة للزوار.

أفضل طريقة لتوزيع المحتوى على الصفحة الرئيسية من وجهة نظري، هي إنك تبتدي بالعنوان الرئيسي للمحتوى أو الحاجة اللي عايز تتكلم عنها في موقعك ويفضل يكون العنوان قصير ويوصل المعنى بسهولة.

بعد ما قدمنا العنوان، هيكون قدامنا فقرة صغيرة تعتبر مقدمة للمحتوى الموجود على الصفحة الرئيسية، حاول بردو استخدام جمل قصيرة وتوصل للزائر المعاناة اللي بيحس بيها في نقطة معينة هتقدمله العلاج ليها من خلال محتواك.

لو كان عندك عرض كويس للزائر، فالمكان المناسب لتقديم العرض ده هو بعد المقدمة لإنك في المقدمة فكرته بمعاناته والحاجة اللي نقصاه وهي ممكن تكون عندك.

بعد تقديم العرض اللي محتاج إن الزائر يشوفه، لازم تختار call to action قوية تقدر بيها توجه الزائر للتفاعل مع العرض بتاعك والاستفادة منه.

في نهاية الصفحة الرئيسية هيكون شئ رائع إنك تحط لينكات متفرقة لموضوعات فرعية جوا المحتوى الرئيسي، لإن كل زائر هيكون مهتم بنقطة واحدة أو مجموعة نقط مختلفة فبالتالي إنت هتسهل عليه إنه يوصل للنقطة اللي بيدور عليها.

  • قدم العرض بتاعك مرة تانية في نهاية الصفحة:

في النقطة اللي فاتت اتكلمنا عن تقسيم محتوى الصفحة الرئيسية بشكل جذاب ويخدم الهدف من صناعة المحتوى نفسه.

مفيش مانع إنك في نهاية الصفحة الرئيسية إنك تقدم نفس العرض بتاعك المرتبط بالمحتوى الموجود على الصفحة.

نهاية الصفحة بيكون موقع مناسب جدا لتقديم العرض بتاعك من جديد للزائر، عشان تضمن إنه بعد ما فهم المحتوى كويس هيقدر يتفاعل مع العرض بتاعك ويستهلكه.

دي كانت 5 أفكار بس تقدر بيها تطور محتوى الصفحة الرئيسية على موقعك الإلكتروني، وأكيد فيه افكار كتير تانية بس مش هنقدر نتكلم عنها كلها في نفس المقالة.

LEAVE A REPLY

Please enter your comment!
Please enter your name here