الموقع الإلكتروني - موقع إلكتروني

عشان تعرف اهمية ترتيب موقعك في جوجل لازم تعرف ان كل يوم بتحصل حوالي 3.45 مليار عملية بحث جديدة من خلال موقع البحث الشهير جوجل، 86% من عمليات البحث دى بتقف عند الصفحة الأولى وبس من نتائج البحث.

لو ركزت في المعلومة اللي قولتها دلوقتى، هتعرف إنه مبقاش رفاهية أو حاجة ثانوية إنك تتقدم في ترتيب موقعك بالنسبة لموقع البحث جوجل، وإنك لازم تعمل ده بسرعة أوي عشان تقدر تستفيد بجد من موقعك الإلكتروني وتوصل لأكبر عدد ممكن من المهتمين بالمجال بتاعك.

موضوع مقالتنا النهاردة هيعرفك على 5 خطوات أساسية تقدر بيها إنك تحسن من ترتيب موقعك في موقع البحث جوجل بمنتهى البساطة والسرعة….خلونا نعرف إيه هي الخطوات دي.

  • الخطوة الأولى – المحتوي

أول وأهم خطوة في طريق تحسين ترتيب وأداء موقعك في جوجل هو المحتوى اللي بتقدمه.

من أهم صفات المحتوى الجذاب بالنسبة للناس وبالنسبة لجوجل كمان، إنه يكون حصري جدا وكمان متجدد باستمرار، وده هيخلي جوجل يحسّن من ترتيب موقعك في فترة بسيطة.

  • الخطوة الثانية –  الصور

زي ما المحتوي الحصري والمتجدد بيجذب الزوار وبيحسن ترتيبك في جوجل، الصور كمان عليها عامل مهم جداً في تحسين ترتيب موقعك في جوجل.

مش كفاية إنك تستخدم صور كويسة وجذابة للعين

لازم تهتم كمان إنك في وصف الصورة اللي بيقراها ويترجمها جوجل إنك تحط الكلمات المفتاحية اللي بتتكلم عن الموضوع المضاف له الصورة دي

الاهتمام بوصف الصور هيسهّل من مهمة جوجل إنه يحط موقعك في ترتيب أعلى.

  • الخطوة التالتة – اللينكات

حاول دايماً إنك توجد الرابط ما بين كل قطعة محتوى في موقعك وبين بقية القطع التانية، في كل مقالة أو قطعة محتوى حاول تستخدم اللينكات الداخلية لمقالات تانية أقدم على موقعك.

استخدام اللينكات الداخلية وربط كل مقالة في موقعك بمقالات تانية أقدم بتخدم نفس الموضوع أو قريبة منه، هيحسن جداً من ترتيبك فى جوجل.

  • الخطوة الرابعة – مشاركة المحتوي

حاول إنك تشارك كل محتوى جديد بتقدمه على موقعك مع مواقع أو شخصيات مؤثرة أكتر في مجالك.

انتشارك في أكتر من مكان خصوصاً في المواقع المؤثرة واللي ليها ترتيب عالي وثقة قوية عند جوجل، هيخليه بشكل أتوماتيكي يرفع ترتيبك فى البحث بشكل سريع.

  • الخطوة الخامسة – الموبايل

كلنا عارفين طبعاً إن نسبة دخول الزوار للمواقع الإلكترونية من خلال الموبايل بتزيد كل لحظة.

عشان تستفيد من الحقيقة دي لازم يكون موقعك الإلكتروني ملائم للدخول من خلال الموبايل، لإن ده لو مش موجود هتفقد نسبة كبيرة اوي من الزوار المهتمين بالمجال بتاعك، وكمان هيقلل من ترتيبك فى جوجل.

دي كانت اهم 5 خطوات من وجهة نظري تقدر بيها إنك تحسن من ترتيب موقعك في جوجل، قولنا إيه هي أهم خطوة فيهم من وجهة نظرك، وإيه الخطوات اللي إنت بتطبقها فعلا دلوقتي؟

LEAVE A REPLY

Please enter your comment!
Please enter your name here