مسابقات انستجرام

عمل المسابقات واحدة من أكتر الطرق فعالية في جذب الجمهور، وخلق تفاعل قوي معاهم وترسيخ صورة ذهنية قوية للبراند صاحب المسابقة، خصوصا مسابقات انستجرام بالذات.

لكن عشان تعمل مسابقة قوية على الانستجرام وتقدر تحقق منها الأهداف اللي حطيتها، لازم تتبع بعض القواعد  اللي تضمن لك النجاح ده وفي نفس الوقت تتجنب المعاقبة من الانستجرام نفسه.

أنا هنا حبيت اتكلم معاك عن 5 قواعد بس من القواعد اللي لازم تلتزم بيها وإنت بتعمل مسابقات انستجرام ، وهتكلم عن كل قاعدة فيهم بشئ من التفصيل:

  • القاعدة الأولى:

لازم تأكد لجمهورك إن المسابقة دي غير مدعومة أو مشتركة مع الانستجرام، وإنك إنت لوحدك كبراند صاحب المسئولية الكاملة عن المسابقة بكل تفاصيلها.

  • القاعدة التانية:

وضح كل الشروط والأحكام الواجب توافرها في الأشخاص اللي ممكن يشتركوا معاك في المسابقة دي بمنتهى الدقة وبمنتهى التفصيل.

  • القاعدة التالتة:

حدد بالظبط النطاق الجغرافي للمسابقة بتاعتك، يعني مثلا القاهرة ولا اسكندرية أو حتى الصعيد كله، المهم تحدد النطاق الجغرافي للمسابقة بشكل دقيق في الإعلان عن المسابقة، عشان مترجعش ترفض دخول ناس المسابقة رغم توافر كل الشروط فيهم.

  • القاعدة الرابعة:

عرف جمهورك الجوايز اللي مستنياهم في حالة الفوز بالمسابقة اللي أعلنت عنها من خلال الانستجرام، ده هيشجع جمهورك إنه يشارك ويتفاعل معاك بشكل فيه حماس أكتر من مسابقة مبهمة الجوايز.

  • القاعدة الخامسة:

بعد ما حددت قيمة الجوايز اللي مستنية جمهورك اللي هيفوز بالمسابقة،

لازم تعرفهم إزاي الجوايز دي هتوصلهم و امتى بالظبط، توضيح المعلومات دي هيوفر عليك تعب ومشاكل كتير بعدين، على الأقل مش هتلاقي حد بيستفسر عن وصول الجايزة بتاعته قبل المعاد المحدد.

لو فكرنا شوية هنلاقي إن القواعد اللي ذكرناها هنا ممكن تطبق على أي نوع مسابقات على أي موقع من مواقع السوشيال ميديا.

لكن موقع الانستجرام له طبيعة خاصة مع المسابقات وممكن يحقق لك نتايج فوق الممتازة مع المسابقات لو طبقت القواعد اللي اتكلمنا عنها فوق دي بشكل احترافي ودقيق.

لو جربت المسابقات على السوشيال ميديا عموما او مسابقات انستجرام خصوصا احكيلنا تجربتك في الكومنتس.

LEAVE A REPLY

Please enter your comment!
Please enter your name here