استراتيجية المحتوى

أعتقد إنك متفق معايا في إن الوقت اللي إحنا بنعيشه دلوقتي هو عصر المحتوى الرقمي، أغلب البراندات حول العالم في مختلف المجالات وحتى الأحجام بتقدم دلوقتي نوع أو أكتر من المحتوى لجمهورها بالذات على السوشيال ميديا.

لما بدأت أغلب البراندات في العالم تعرف أهمية المحتوى، وبدأت تشتغل عليه أصبح عندنا زحمة كبيرة في المحتوى المعروض في أي مجال على وش الأرض، وده رغم إنه شئ مهم ورائع للعميل إلا إنه بيمثل تحدي كبير جدا لصنّاع المحتوى اللي لازم يكون محتواهم بشكل أو بآخر مميز عن غيرهم عشان يوصل للعميل فعلاً.

في المقالة دي هنتكلم عن 4 أنواع من المحتوى تقدر تجذب بيها الجمهور المستهدف بتاعك بشكل أسرع، وتقدر كمان تتفاعل معاهم من خلاله وتدفعهم لاستهلاكه بالشكل اللي إنت محتاجه وده بالتأكيد هيأثر بشكل إيجابي على مبيعاتك وصورتك قدامهم….يلا بينا.

  • إستخدم الأسئلة

حسب موقع Buzzsumo فإن الأسئلة بتيجي في المراتب الأولى من أكتر أنواع المحتوى اللي الجمهور بيتفاعل معاها وينجذب ليها بسرعة، وده لأن الأسئلة دايما بتحرك العقل وتحفّزه إنه يشتغل.

ممكن تسأل جمهورك في أي حاجة سواء متعلقة بالمنتج أو الخدمة اللي بتقدمها، وهل عندهم أي تعليقات أو تعديلات عليها ولا لا.

ممكن كمان تسألهم عن حاجة خاصة بيهم، والإجابات هتوضح لك وتضيف ليك معلومات أكتر عن الشخصيات اللي بتتعامل معاها من خلال منتجك أو خدمتك.

  • استطلاعات الرأي

أغلب مواقع السوشيال ميديا دلوقتي أدرجت استطلاعات الرأي ضمن أنواع المحتوى اللي تقدر تقدمها لجمهورك من خلالها، وده بيثبت لك قد إيه النوع ده من المحتوى مهم جدا ولازم تستغلّه.

ببساطة الناس بتحب تعبّر عن رأيها في أي حاجة، وبتكون فخورة كمان ومتمسكة بفرصة إبداء رأيها سواء كان صح أو غلط، وبيحصل تفاعل ونقاش ما بين الآراء المختلفة على السوشيال ميديا، وده معناه زيادة التفاعل والوصول لعدد أكبر من المستهدفين بتوعك.

  • اطلع Live

إنك تطلع تعمل Live مع جمهورك في أي قناة من قنواتك على السوشيال ميديا، ده شئ رائع وهيحسس جمهورك قد إيه إنت قريب منهم ومهتم إنك تتفاعل وتتواصل معاهم بشكل مباشر أكتر وده هينعكس طبعاً على ثقتهم فيك وقربهم منك.

ممكن تستخدم خاصية ال Live في أكتر من غرض على حسب هدفك أو نوعية الجمهور اللي بتتعامل معاه، زي مثلاً ممكن تطلع live تجاوب فيه على الأسئلة اللي وصلت لك من الجمهور بخصوص المنتج أو الخدمة اللي بتقدمها.

حاجة كمان ممكن يكون ال Live مفيد فيها، هي إنك ممكن كل فترة معينة تستضيف شخصية مؤثرة في مجالك وتتناقش معاها في أمور عامة بخصوص مجال شغلك، ده هيزوّد ثقة الجمهور فيك بشكل كبير جدا ً.

  • اخترع ألعاب ومسابقات جديدة

إحساس النصر أو الفوز من أروع الأحاسيس اللي ممكن يحس بيها أي إنسان، وده بالظبط اللي بتلعب عليه الألعاب والمسابقات اللي ممكن تنفّذها على السوشيال ميديا.

كلما كانت المسابقة أو اللعبة بسيطة وواضحة، ده هيشجّع عدد أكبر من الجمهور إنه يتفاعل معاها ويحاول يحلّ اللغز ويفوز في المسابقة، والأهم من المسابقة نفسها هي الجايزة اللي هياخدها الفايز من المسابقة دي.

إنت ممكن تضرب عصفورين بحجر واحد من خلال المسابقات أو الألعاب دي، أول حاجة إنك هتعلّي إحساس الرغبة في الفوز عند الجمهور بتاعك وده هيشجّعه إنه يتفاعل مع المحتوى اللي بتقدمه، وتاني حاجة هو إنك تقدر تعرض منتجاتك أو خدماتك في شكل جوايز أو حتى حلول للمسابقات دي، وده هيكون أسلوب قوي جداً للدعاية والإعلان عن نفسّك للجمهور.

في النهاية…..

أنواع المحتوى اللي ممكن تستخدمها في جذب الجمهور المستهدف لا نهائية، وكلما كنت متجدد باستمرار وبتفكّر برا الصندوق هتقدر تجذب أكبر عدد ممكن من المهتمين بالمجال بتاعك و بالمحتوى اللي بتقدمه…. يا ترى بتستخدم أي نوع من المحتوى عشان تتفاعل مع جمهورك بشكل أكبر؟

 

 

LEAVE A REPLY

Please enter your comment!
Please enter your name here