استراتيجية المحتوى

لو اتكلمنا عن الصور، فالحقايق كلها بتقول إن 90% من ذاكرة مخ الإنسان هي عبارة عن صور مختلفة، وإن المخ بتاعنا بيقدر يعالج الصور ويحفظّها أسرع 60000 مرة من المحتوى المكتوب.

من معرفّتك للحقايق دي لازم تكون كصانع محتوى حاطط في اعتبارك استخدام الصور بشكل كبير لو حابب فعلاً إنك تأثر على العميل بتاعك وتوجّهه للتفاعل مع المحتوى اللي بتقدمهوله.

النهاردة أنا حابب أتكلم معاك عن 5 أنواع من الصور اللي ممكن تستخدمها عشان تزود التأثير بتاع المحتوى اللي بتقدمه على جمهورك….خلينا نبتدي.

  • الصور الشخصية

من وجهة نظري إن الصور الشخصية من أهم أنواع الصور اللي ممكن تأثر في الجمهور المستهدف، وده ببساطة لأنها شخصية وخاصة بيك إنت أو بالبراند بتاعك.

الصور الشخصية مش محتاجة تكنولوجيا متطورة عشان تلقطها، كفاية يكون معاك موبايل وتاخد اللقطة وتعرضها على جمهورك، وهتشوف التفاعل مع المحتوى بتاعك في وقت سريع جداً.

  • الرسومات البيانية

زي ما اتفقنا إن مخ الإنسان بيستوعب ويعالج الصور بشكل أسرع الآلاف المرات من معالجته للبيانات المكتوبة، عشان كده استخدام الرسوم البيانية شئ مهم جداً.

الرسومات البيانية والجداول بتلخص تقارير ودراسات كاملة في صورة واحدة أو عدة صور بسيطة، وده هيسهل عليك شرحها وهيسهل على الجمهور استيعابها وحفظها كمان لو مطلوب ده.

  • السكرين شوت

ناس كتير وأنا واحد منهم، لما بتكلم مع حد مع أصحابي وأحب اشرحله حاجة عملية وفيها خطوات كتير على برنامج مثلاً أو موقع إلكتروني، بيكون الحل الأسهل والأسرع إني ابعتله سكرين شوت بكل خطوة بعملها.

بنفس الطريقة ممكن تشرح لجمهورك حاجة معينة خاصة بشغلك إنت أو حتى في المجال بتاعك عموماً خطوة بخطوة من خلال إنك تستخدم السكرين شوت في المحتوى بتاعك، وده هيضمن إنهم يستوعبوك بسرعة.

  • الصور الجاهزة

لو كنت من الكتّاب اللي بيحبوا يبتدوا المقالة بتاعتهم بصورة مرتبطة بموضوع المقالة، فالصور الجاهزة هي الاختيار المناسب للمهمة دي.

ممكن تلاقيها بسهولة جداً على الإنترنت من غير ما تخضع لقوانين حقوق الملكية الفكرية، لأن فيه مصادر ممكن تقدمها لك ببلاش.

أهميتها خصوصاً لو استخدمتها في بداية المقالة بتاعتك بتكون في إنها بتحط العميل في صورة ذهنية معينة مرتبطة بالموضوع اللي بتتكلم عنه.

  • لقطات من الأفلام والمسلسلات

فكّر معايا….لو صادفت مقالة أو حتى بوست على السوشيال ميديا موجود فيه لقطة أو إفيه إنت بتحبه وحافظه من فيلمك أو مسلسلك المفضل، يا تري نسبة إنك تتفاعل مع المقالة أو البوست ده هتزيد قد إيه؟….فكرت؟

هو ده اللي انا عايز اقولهولك بالظبط، عشان تقرب من جمهورك وتجذبهم للتفاعل مع المحتوى بتاعك لازم تغريهم بحاجة هما بيحبوها وبيتكلموا عليها دايماً زي الأفلام والمسلسلات مثلاً.

الخلاصة….

محدش يختلف دلوقتي على أهمية وتأثير الصور على مخ الإنسان، وازاي إنه بيستوعبها ويتفاعل معاها بشكل أسرع وأقوى بكتير جداً.

لو إنت لحد دلوقتي مش بتستخدمها في المحتوى بتاعك، فأنت فايتك كتير أوي ممكن تحققه بسهولة لو ضفت صور مناسبة ليك و لجمهورك في نفس الوقت.

أنا هنا اتكلمنا عن 5 أنواع بس من اللي ممكن تعتمد عليها لتدعيم وزيادة التفاعل مع المحتوى بتاعك، لكن أكيد فيه أنواع تانية كتير….قولي أي نوع من الصور ممكن يفيدك فى شغلك أكتر؟

2 COMMENTS

  1. على الرغم من ان كلامك كله صحيح وانا متفق معاك إلا أني كنت أتمنى انك تكتب في النهايه
    إن اختيار الموضوع وعنوانه مهم جدا في نفس درجة اختيار الصور واكبر دليل هو أننا قرأنا كلامك وهو مافيهوش صور غير صورة واحده في الأول بسيطه

    • طبعا عندك حق يامحمد بالنسبه لجزئية الصور لكن احنا يهمنا ان المعلومة توصلك عن اهمية الصور وطبعا مفيش خلاف ان العنوان مهم جدا وبيكون سبب انك تقرا كتير من المقالات لكن ده موضوع تاني خالص ممكن نتكلم فيه لوحده وشكرا ليك على الكومنت طبعا

LEAVE A REPLY

Please enter your comment!
Please enter your name here