Facebook Dating

طبيعي جدا من خلال المعلومات والتفاصيل اللي يعرفها عنك الفيس بوك إنه يقدر بشكل كبير يوصّلك لشريك حياتك، وده فعلا اللي قرر يعمله الفيس بوك من خلال إعلانه عن خدمة جديدة وهي خدمة الـ Facebook Dating والبداية من كولومبيا في أواخر الشهر اللي فات.

هل عندك أي شك إن الفيس بوك يعرف كل حاجة عنك؟

ال فيس بوك يعرف كل حاجة بتحبّها وبتهتم بيها، يعرف معلومات كتيرة عن أصحابك وقرايبك وإزاي بتتواصل معاهم، ومين فيهم الأقرب ليك ومين فيهم علاقتك بيه سطحية نوعا ما؟….يعرف معلومات أكتر بكتير مما تتوقّعه.

الإعلان عن ال Facebook Dating ابتدا من مؤتمر الفيس بوك الأخير في شهر مايو اللي فات، لما قرر الفيس بوك إنه بالخدمة دي ينافس مواقع مشهورة زي Tinder مثلا واللي سبقته في موضوع المواعدة ده وبالفعل مجرد الإعلان عن الخدمة دي أثر بشكل كبير وملحوظ على مواقع المواعدة اللي بينافسها الفيس بوك من خلال خدمة Facebook Dating.

الفرق الجوهري ما بين خدمة Facebook Dating وأي موقع تاني للمواعدة

الفيس بوك عمل الخدمة دي عشان يساعد الناس إنها تبني علاقات قوية ومستمرة على عكس المواقع التانية اللي ممكن تستخدمها لبناء علاقات عابرة وخلاص، وده يمكن يكون من عوامل الثقة اللي هتحفّز الجمهور إنه يجرب الخدمة دي ويبعد عن المواقع التانية خصوصا لما يكون بيدور على علاقة مستقرة وجادة.

أي حد هتتكلم معاه من خلال Facebook Dating مش هيعرف إنك بتكلمه بالطريقة دي، ولكن هيظهر إنك بتتكلم من خلال الفيس بوك ماسنجر بشكل طبيعي جدا، وده في حد ذاته من طرق الفيس بوك لمساعدتك في بناء علاقات قوية ومستمرة، لإن طبعا مش لطيف إنك تبتدي علاقة جادة من خلال خدمة مواعدة حتى لو اللي بيقدمها الفيس بوك بكل ما يملكه من ثقة الجمهور بتاعه وده هيكون مؤثر أكتر في جمهور الشرق الأوسط لو الخدمة دي اتفعّلت هنا في الفترة الجاية.

تفتكر إيه اللي ممكن يحصل لو اتفعّلت خدمة Facebook Dating في مصر، هل هتكون مفيدة ولا هيتم استخدامها بشكل سئ زي حاجات كتير بدأت كويسة وبدأت تسوء من خلال الاستخدام الغلط ليها؟

LEAVE A REPLY

Please enter your comment!
Please enter your name here