السوشيال ميديا

سهل جدا إنه يكون ليك تواجد على كل مواقع السوشيال ميديا ، ولكن اللي مش سهل خالص هو إنك تقدر تبني علاقة قوية بينك وبين جمهورك الموجود على السوشيال ميديا وده اللي بيفرق بين براند قوي ومشهور وبين أي براند عادي

كل يوم بيزيد وعي الجمهور على السوشيال ميديا، وبيقدروا يفرقوا كويس أوي ما بين البراندات اللي فعلاً بتقدم لهم محتوى مفيد وقيّم، وما بين البراندات اللي كل هدفها هو بيع منتجاتها وخدماتها وبس، عشان كده لو عايز تكون علاقتك بجمهورك على السوشيال ميديا قوية لازم تقدم لهم فايدة وقيمة حقيقية من خلال المحتوى بتاعك.

في المقالة دي هنتكلم عن مجموعة طرق وأفكار تقدر بيها إنك تقوّي علاقتك بجمهورك الموجود على السوشيال ميديا

  • أشكر جمهورك

جمهورك مهما اختلفت صفاته أو عقليّاته، فهو في النهاية بشر بيحب ويتشجّع بالتقدير والاحترام.

مش مهم أبدا إنك تكتب بوست طويل أو تعمل فيديو إحترافي عشان تشكر فيه الجمهور بتاعك، كفاية إنك تستخدم كلمات بسيطة جدا تعبّر عن مدى احترامك وتقديرك لوجودهم في حياة البراند بتاعك.

كلمات الشكر والتقدير بتحفزّ عند الإنسان طاقات جديدة، وتنمّي جواه الشعور بالانتماء والحب لمصدر التقدير والشكر ده بمنتهى القوة.

  • انشر تعليقات وتقييمات الجمهور

إنك تحسس الجمهور بتاعك إن رأيه في البراند بتاعك أو حتى في منتج أو خدمة إنت بتقدمها شئ مهم، أكيد دي حاجة هتفرق جدا في نظرته ليك كبراند بيقدّره ويحترم رأيه ومش بيخبّيه حتى لو كان سلبي.

من ناحية تانية، تعليقات وتقييمات الجمهور بيعتبر نوع قوي جدا من أنواع المحتوى اللي بينتشر بسرعة جدا على السوشيال ميديا، ومش محتاج منك مجهود في تحضيره ونشره.

  • اعتمد على المسابقات

المسابقات كفكرة قايمة على غريزة المغامرة والتحدى واللي موجودة بشكل أساسي عند أغلب الناس، عشان كده بيكون عليها تفاعل وإقبال كبير من جمهور السوشيال ميديا.

قبل ما تفكّر إنك تعمل مسابقة على موقع من مواقع السوشيال ميديا، لازم تعرف كويس القواعد اللي بتحكم الموضوع ده على الموقع اللي اختارته، لأنها بتفرق ما بين موقع وموقع تاني.

ممكن تستخدم المسابقات على كل قنواتك على السوشيال ميديا، أو تكتفي بإنك تعملها على قناة واحدة بس وتبتدي توجّه الجمهور من القنوات التانية للمشاركة فيها.

  • قدم عروض خاصة

ممكن تقدم عروض خاصة لجمهور السوشيال ميديا بتاعك، والعروض دي هتكون نوع من أنواع التقدير والشكر ليهم على تفاعلهم معاك على السوشيال ميديا.

من ناحية تانية العروض الخاصة على السوشيال ميديا، هتديك الفرصة إنك تحدد بشكل كبير كمية المبيعات والأرباح اللي بتجيلك عن طريق السوشيال ميديا بشكل خاص.

  • إسال الجمهور

تفتكر إيه اللي هيخلي جمهورك يتفاعل معاك ويقرّب منك كبراند أكتر من إنه يحس إنه مشارك معاك في صنع القرار مهما كان القرار ده بسيط.

زي ما سؤال الجمهور عن تفضيلاتهم ورغباتهم المتعلقة بالبيزنس بتاعك، هي طريقة لإثبات التقدير والاحترام ليهم، فهي طريقة قوية لتوليد المحتوى التفاعلي اللي بينتشر بسرعة جدا على السوشيال ميديا.

وجودك على السوشيال ميديا مبقاش يتقاس بعدد المتابعين أو المشتركين في قنواتك على السوشيال ميديا، لكن قوة وجودك على السوشيال ميديا بتتقاس بمدى قوة التفاعل مع الجمهور.

فيه طرق وأفكار كتير جدا تقدر بيها إنك تقوّي علاقتك بجمهورك على السوشيال ميديا، تفتكر إيه الأفكار التانية اللي متكلمناش عنها في المقالة دي؟

LEAVE A REPLY

Please enter your comment!
Please enter your name here