في 2018 أغلب الدراسات بتقول إن مستخدمي الإنترنت في العالم بيقضوا تلت وقتهم تقريباً وهما بيتفرجوا على الفيديو على مواقع السوشيال ميديا المختلفة.

في الفيس بوك بس فيه 500 مليون شخص بيتفرج على الفيديوهات الموجودة عليه كل يوم وده رقم في حد ذاته رهيب.

رغم إن صناعة الفيديوهات تعتبر مكلّفة من ناحية الوقت والمجهود وطبعاً الفلوس، إلا إن النتايج اللي بتحققها الفيديوهات على مستوى الانتشار والتفاعل مع الجمهور خلّى حوالي 87% من المسوّقين يعتمدوا عليها بشكل كبير.

في المقالة دي هنتكلم عن طرق تقدر بيها إنك تزوّد فعّالية الفيديوهات اللي بتقدمها لجمهورك على أغلب مواقع السوشيال ميديا…..يلا بينا.

  • الفيس بوك – Facebook

فيس بوك في الفترة الأخيرة بدأ يدخل سوق الفيديوهات بقوّة ويزاحم عملاق صناعة الفيديوهات القديم يوتيوب، وده من خلال إضافة جديدة للموقع وهي Facebook Watch واللي يعتبر منافس قوي لليوتيوب، ومتاح لجميع الأفراد والصفحات على الفيس بوك وقريب جداً هيكون فيه نظام ربح من الموضوع ده.

كمان الفيس بوك طوّر خاصية Facebook Stories، عشان تقدر تنشر من خلالها فيديوهات ضمن شروط معينة.

عشان تضمن وصول الفيديوهات بتاعتك على الفيس بوك لأكبر عدد ممكن من المهتمين وتفاعلهم معاها ممكن تجرّب الطرق دي:

  1. إطلع live باستمرار ودي حاجة مهمة اوي وهتزوّد تفاعل الجمهور مع المحتوى بتاعك، وهيحسسهم إنك فعلاً قريب منهم ومهتم تتواصل معاهم دايماً.
  2. إرفع فيديوهاتك من خلال الفيس بوك مباشرة، ومتعتمدتش على لينكات لفيديوهات موجودة في مواقع تانية زي اليوتيوب مثلاً.
  3. حط وصف مناسب للفيديو بتاعك، عشان أغلب الجمهور بيتفرج على الفيديوهات من غير صوت، فوجود وصف مناسب للفيديو هيوصّلهم المعلومة المتاحة في الفيديو بشكل تاني.
  • الانستجرام – Instagram

من خلال الانستجرام فأنت مطلوب منك في خلال 60 ثانية على أكتر تقدير إنك تشدّ عين العميل وتجبره إنه يتفاعل مع المحتوى اللي بتقدمه له في الفيديو بتاعك، وده هيكون تحدي كبير ليك كمسوّق أو منتج محتوى.

ممكن تستغل الانستجرام بشكل قوي في الترويج لشغلك من خلال الفيديوهات لو اعتمدت على النقط دي:

  1. إستخدم الجرافيك والأنيميشن عشان تجذب عين العميل بسرعة لشغلك، ودي هتكون طريقة ذكية رغم تكلفتها لكن نتايجها كبيرة.
  2. استغلال ال  live وال stories شئ مهم جدا خصوصاً لو عرفت إن فيه 400 مليون شخص يومياً بيستخدم وبيشوف ال stories الموجودة على الانستجرام.
  • تويتر- Twitter

الفيديوهات على تويتر ممكن تنتشر بمعدل 6 مرات أكتر من التويتات العادية أو حتى الصور، وفي الفترة اللي فاتت كان تركيز تويتر على تقوية وصول الفيديوهات بشكل أكبر للمستخدمين.

عشان تطلع بأفضل نتيجة ممكنة من الفيديوهات على تويتر خد بالك من الملاحظات دي:

  1. حاول تختصر في الفيديو بتاعك وتوصّل المعلومة في أقل وقت ممكن، لأن طبيعة تويتر أصلا قايمة على فكرة المعلومات السريعة بدون أي تفاصيل مرهقة.
  2. زي الفيس بوك بالظبط ارفع فيديوهاتك بشكل مباشر على تويتر ومتحاولش تستخدم فيديوهات مرفوعة على مواقع تانية زي اليوتيوب.
  • لينكدإن – LinkedIn

رغم إن لينكدإن موقع إحترافي بامتياز وبيهتم بالجانب العملي من حياة المستخدمين، إلا إنه في الفترة الأخيرة بدأ يهتم بالمحتوى القائم على الفيديوهات ويزود نسبة الوصول ليها زي ما سبقه قبل كده الفيس بوك وتويتر.

عشان تنجح في جذب الجمهور وتخليهم يتفاعلوا مع الفيديو بتاعك على لينكدإن ركز على شوية نقط وهي:

  1. قدم العروض بتاعتك بشكل صريح وواضح للعميل، مش كفاية يكون التنفيذ للفيديو جميل الأهم إنه يكون واضح وصريح في تقديم العروض أو حتى المعلومات، وياريت الفيديوهات متزيدش عن دقيقتين بس.
  2. استخدم ال subtitles عشان يقدر المستخدم اللي بيشوف الفيديو بتاعك من غير صوت إنه يفهم ويتفاعل مع المحتوى اللي قدمته له في الفيديو.

تنفيذ الفيديوهات رغم إنه شئ مرهق ومحتاج وقت ومجهود كبير عشان يخرج بالشكل اللي بتتمناه، إلا إنك هتحس وتشوف بنفسك نتايج اعتمادك على النوع ده من المحتوى في وقت سريع جداً….قولي آخر مرة عملت فيها فيديو كان عن إيه؟

LEAVE A REPLY

Please enter your comment!
Please enter your name here