B2B

رغم اتفاق ال Brands اللي بتعتمد على نظام ال B2C) Business To Customers) مع ال Brands اللي بتعتمد على نظام ال B2B) Business To Business) في أساسيات وطرق التسويق الرئيسية، إلا إننا مع البحث والتعمّق هنلاقي اختلافات واضحة في طريقة عمل التسويق في كل نوع منهم.

خليك فاهم إن التسويق ل Brand B2B ، مبقاش واقف في مكانه اللي كان موجود فيه من 10 سنين فاتوا، وبقت المنافسة فيه صعبة وشرسة جداً ويمكن أكتر من المنافسة ما بين ال B2C Brands.

اللي خلى المنافسة دي شرسة في سوق ال B2B ،هو نوعية الجمهور المستهدف للبراند بتاعك، إنت هنا بتستهدف صنّاع القرار في شركات أو مؤسسات معينة، ودول بطبيعتهم مختلفين تماماً عن الجمهور العادي، ناس أكتر دقة وواقعية ودراية بكل حاجة بتحصل في مجال شغلك.

عشان كده إنت محتاج ك brand شغال في سوق ال B2B إنك تزود فرصتك في تسويق نفسك وشغلك، وتوصل للجمهور المستهدف بأشكال وطرق جديدة غير اللي متعود عليها.

في المقالة دي هنتكلم عن 5 طرق تقدر تثبت بيها نفسك وتسويق لشغلك أون لاين لو كنت براند شغال في سوق ال B2B.

  • حلل العميل المستهدف

تحليل العميل المستهدف بيكون عن طريق جمع أكبر عدد ممكن من المعلومات والتفاصيل الدقيقة المتعلّقة بفئة أو مجموعة معينة من الناس.

لما تجمّع المعلومات دي هتقدر تفهم دماغ جمهورك المستهدف، وتحاول إنك توصل لهم بشكل يناسب توجهاتهم وأفكارهم ويحقق توقعاتهم بالنسبة للبراند بتاعك.

  • ادرس المؤثرين

في كل مجال في العالم عندنا مجموعة مؤثرين واللي هي بتكون في حدود نسبة 1% من الجمهور الموجود و مهتم بالمجال ده.

دراسة حياة وسلوكيات المؤثرين سواء كان ده في الواقع أو أون لاين، هيديك فرصة عظيمة عشان توصل بمنّتجك أو خدمتك للمؤثرين دول، وبالتالي هتكون ضمنت ثقة وتفاعل عدد كبير من الجمهور المتأثر والتابع للشخصيات المؤثرة دي واللي بيثق فيها وفي اختياراتها.

  • استهدف المتخصصين

لو كنت شغال على براند B2B فأنت ممكن تكون بتستهدف فئة من المتخصصين زي المهندسين أو المبرمجين مثلاً.

لو قدرت توصل لعدد ولو بسيط من المتخصصين دول، وشديت انتباههم وأجبرتهم على نشر ومشاركة محتواك الخاص، فأنت بالتالي هتكسب ثقة مئات أو آلاف من المتخصصين اللي شايفين إنهم شبههم في كل حاجة.

  • جاوب على إمتى وفين وازاي

بما انك دلوقتي حللت الجمهور بتاعك، وعرفت شخصيته وطريقة تفكيره وسلوكياته، فأنت دلوقتي تقدر تجاوب على الاسئلة دي (إمتى وفين وازاي).

الاسئلة دي مهمة جداً قبل ما تفكر إنك تكتب قطعة محتوى واحدة، لازم تعرف هتكتب إمتى والمحتوى اللي هتكتبه هيكون مكانه فين بالظبط، وازاي هتوصًل فكرتك أو رؤيتك اللي عايز الجمهور يقتنع بيها من خلال قطعة المحتوى دي.

لو قدرت تجاوب على الاسئلة دي، هتوصل للنتايج اللي إنت محتاج تحققها من كل قطعة محتوى بتكتبها أو بتقدمها للجمهور.

  • استخدم الفيديو

رغم إن أغلب الناس اللي بتشتغل تسويق أون لاين عارفة قيمة وأهمية صنع الفيديوهات كنوع خاص وقوى من أنواع المحتوى، إلا إن النوع ده لسه مخدش حقه أوي في سوق ال B2B.

في كل الأحوال حتى لو كنت شغال على براند B2B، فأنت في النهاية بتتكلم مع بشر زيي وزيك، وكل الاحصائيات والدراسات بتثبت تفاعل ومشاركة الجمهور مع المحتوى في شكل فيديوهات بشكل كبير أكتر من أي نوع تاني من المحتوى، عشان كده لازم تعتمد عليه في شغلك أون لاين.

دي كانت 5 طرق تقدر تثبت بيها نفسك وتسوق بيها لشغلك والبراند بتاعك لو كنت شغال في سوق ال B2B.

LEAVE A REPLY

Please enter your comment!
Please enter your name here