Blog Post

إنك تنتج أو تكتب أي Blog Post على موقعك دي حاجة مهمة اوي، لكن أكيد الأهم منها إنك تقدر توصّله للجمهور المستهدف بشكل قوي وجذّاب وإلا هتكون ببساطة بترمي مجهودك على الأرض.

نجاح أي blog post بتعمله بيبتدي مع أول حرف بتكتبه فيه، ومش بينتهي عند النشر، لكن مطلوب منك من بداية التفكير في الموضوع اللي هتتكلم عنه لحد التعامل مع جمهورك بعد النشر إنك تتعامل باحترافية عالية عشان تقدر توصل للهدف من ورا كتابتك ليه.

في المقالة دي أنا عايز اتكلم معاك عن بعض الخطوات اللي ممكن تقوم بيها عشان تضمن إن مجهودك وتعبك في كتابة الـ Blog Post بتاعك مرحش هدر وإنه فعلاً حقق الهدف منه وساب علامة كويسة عند الجمهور المستهدف…..يلا بينا.

  • حدد هدفك بوضوح

ناس كتير بتفرح بإن عندها موقع إلكتروني خاص بيها، وده بيخلّيها تفكّر إنها كلما زودت عدد ال blog posts في الموقع بدون رؤية أو استراتيجية واضحة، ده هيكون شئ في صالح الموقع أو البراند.

لكن أهم وأخطر خطوة قبل تنفيذ أي blog post على الموقع بتاعك، هي إنك تحدد بالظبط إنت بتكتب ده ليه؟، وعايز تأثّر على جمهورك من خلاله بأي طريقة؟

إنك تشتغل في نطاق رؤية أو استراتيجية واضحة وسليمة، ده هيوفر عليك وقت ومجهود كبير جدا ممكن يضيع في عمل blog posts ملهاش أي لازمة ولا هتأثر على موقعك إلا بالسلب.

  • اهتم بال Headlines

مهمة ال Headlines في أي blog post إنها تجذب عين القارئ وتشدّه إنه يشوف بقية السطور اللي تحتها بتحكي عن إيه بالظبط.

حاول تستخدم الحاجات اللي ممكن فعلاً تشدّ عيون القارئ زي مثلاً الأسئلة، لإن معروف إن الأسئلة بتحرّك الذهن وتثير الفضول عند الناس.

كمان ممكن تستخدم الأرقام لإنها بتعلّق بسرعة في عقول الناس، وبتحمّسهم إنهم يشوفوا المحتوى بتاعك.

  • استخدم ال Long-tail Keywords

بخصوص تظبيط ال seo لأي blog post بتقدّمه على موقعك، حاول تستخدم الـ Long-tail Keywords عشان تضمن إنك بتوصل فعلاً للفئة المستهدفة بتاعتك.

  • استخدم الصور

المحتوى المرئي دلوقتي بقى هو أعظم محتوى ممكن تقدمه لجمهورك، لإن العين دايما بتخزّن الصور بكميات أكبر وبشكل أسرع من المحتوى المكتوب.

خد بالك إنك لازم تستخدم الصور اللي بجد تخدم المحتوى بتاعك، وتكون مناسبة للموقع بتاعك بشكل عام ومتوافقة معاه.

من الأفضل إنك تحدد شكل معين للصور اللي ممكن تستخدمها في المحتوى اللي بتقدمه، وتثبّت الشكل ده في كل الصور اللي هتستخدمها في موقعك، ده هيساعدك إنك تبني صورة ذهنية قوية عند العميل بتاعك، وكمان هيساعد جوجل إنه يوصّلك لمراتب أعلى في البحث.

  • خد بالك من الأخطاء

قبل ما تنشر ال blog post لازم تتأكد الأول إن مفيهوش أي أخطاء سواء كانت أخطاء إملائية أو نحوية أو حتى علمية وده شئ وارد طبعاً.

الأفضل إن الشخص اللي كتب ال blog post مش هو الشخص اللي هيراجعه قبل النشر، وده هيكون طريق أسرع لاكتشاف الأخطاء الموجودة فيه قبل ما تنشره فعلاً….لو ده مش متاح بالنسبة لك، أنصحك بمراجعة المحتوى أكتر من مرة قبل ما تفكّر تنشره.

  • استخدم السوشيال ميديا

بعد ما تقرر إنك تنشر ال blog post على موقعك، هتكون بدأت في مرحلة جديدة وهي مرحلة الإعلان عن المحتوى اللي قدمته لجمهورك بشكل واسع أكتر.

من أهم وأسرع طرق الإعلان عن المحتوى بتاعك على الموقع، هو إنك تستخدم السوشيال ميديا للغرض ده.

ممكن  تستخدم السوشيال ميديا في إنك تتكلم باختصار عن موضوع ال blog post مع جمهورك على السوشيال ميديا عشان تحفّزه إنه يدخل ويقراه من خلال الموقع، وفيه طرق تانية كتير غير كده طبعاً.

  • تفاعل مع جمهورك

سواء من خلال الموقع بتاعك أو من خلال قنواتك على السوشيال ميديا، مطلوب منك التفاعل مع جمهورك والرد على أسئلتهم واستفساراتهم بخصوص المحتوى اللي قدمته ليهم.

كلما كنت سريع ومحترف في التفاعل مع الجمهور، كلما هيحسوا فعلاً بمصداقيتك ورغبتك القوية في مساعدتهم في استهلاك المحتوى بتاعك بأفضل شكل ممكن، وده هيزود من نجاح المحتوى اللي قدمته للجمهور.

لو عندك أي ملاحظات أو خطوات تانية لنجاح ال blog post ممكن تقولي عليها؟

LEAVE A REPLY

Please enter your comment!
Please enter your name here