Facebook Watch

من كام يوم إدارة فيس بوك أعلنت إنه في خلال الشهور الجاية وبشكل تدريجي هيتم إتاحة Facebook Watch لكل صناع المحتوى على مستوى العالم ولكن بشرط خضوعها لشروط معينة.

هو ايه Facebook Watch

كل المهتمين بمجال ال digital marketing عارفين كويس الصراع القوي ما بين فيس بوك ويوتيوب على مين يستحوذ على أكبر عدد ممكن من المستخدمين المتفاعلين حول العالم، وازاي كل موقع فيهم بيحاول إنه يعلّي على المنافس بتاعه وينتشر أكتر.

بسبب المنافسة الشرسة دي، قرر فيس بوك إنه يسحب البساط شوية بشوية من تحت رجل يوتيوب، وده من خلال تشجيع المستخدمين على إنشاء ومشاركة الفيديوهات مع أصحابهم وجمهورهم، ودي كانت خطوة جريئة من فيس بوك إنه يقتحم حتة يتزعمها يوتيوب من زمان، لكنه بيثبت مع الوقت إنه قادر في أي لحظة إنه يسحب البساط من تحت رجل يوتيوب فعلاً.

بداية دخول فيس بوك الصراع مع يوتيوب على زعامة صناعة الفيديوهات بدأت لما فيس بوك ومن خلال التحديثات والتحسينات المتتالية، قدر إنه يوصّل المستخدمين بشكل أكبر للفيديوهات اللي بتنشرها صفحاتهم المفضلة وكمان الفيديوهات اللي أصحابهم تفاعلوا معاها بشكل قوي.

التحديثات والتحسينات دي خلّت مستخدمي فيس بوك يتعودوا على نوع جديد من المحتوى مكنش موجود قبل كده في فيس بوك، وهو محتوى الفيديوهات ومع الوقت كان لازم خطوة جديدة.

بعد ما قدر فيس بوك إنه ينشر ثقافة صناعة ومشاركة الفيديوهات ما بين مستخدميه، كان لازم تيجي الخطوة اللي يعمل فيها فيس بوك مكان أو خاصية جديدة خاصة بصناع محتوى الفيديوهات وده عشان يجذب عدد أكبر من الجمهور، وكان ده متمثل في Facebook Watch.

بطبيعة الحال وزي أي بداية لتحديث أو تجربة جديدة، كان Facebook Watch موجود بس على نطاق ضيق في حدود أمريكا وكندا، ومع الوقت بدأت تدخل دول تانية من أوروبا وأمريكا اللاتينية بالذات.

من كام يوم إدارة فيس بوك أعلنت إنه في خلال الشهور الجاية وبشكل تدريجي هيتم إتاحة Facebook Watch لكل صناع المحتوى على مستوى العالم ولكن بشرط خضوعها لشروط معينة.

ايه هي شروط Facebook Watch

شروط فيس بوك عشان تقدر تستخدم Facebook Watch كصانع محتوى، إنك كبراند أو شخصية عامة يكون عندك 10000 متابع أو أكتر وبتقدم فيديوهات في حدود 3 دقايق مش أقل من كده.

نقطة كمان بخصوص الفيديوهات اللي بتنزلها، لازم تجمّع 30000 مشاهدة لأول دقيقة من الفيديو، وده طبعا عشان فيس بوك يضمن إن جمهورك مهتم فعلاً باللي بتقدمهمله ومش بيعمل scrolling للفيديو وخلاص.

مع إعلان إتاحة Facebook Watch لكل دول العالم، كان لازم فيس بوك يعلن عن حاجة تقدر تغري صناع المحتوى على إنه يسيبوا أماكن تانية زي يوتيوب اللي بتديله مقابل على فيديوهاته ويتجه للفيس بوك.

أعلن فيس بوك عن إن إمكانية وضع إعلانات خلال الفيديوهات هتكون موجودة بردو بشكل تدريجي، وهتبتدي بكام دولة في أوروبا وأمريكا اللاتينية وآسيا، وده طبعا هيشجع صناع المحتوى على إنهم على الأقل يجربوا Facebook Watch بشكل احترافي.

فيس بوك اتكلم عن إن صانع المحتوى له حرية الاختيار في وضع الإعلانات بالشكل والمكان اللي يختاره في الفيديو بتاعه، وممكن تتم العملية دي بشكل أوتوماتيكي.

السؤال دلوقتي هل شايف إن فيس بوك هيقدر ينافس يوتيوب بشكل قوي الفترة الجاية ولا Facebook Watch مش هيقدر يصمد قدام يوتيوب؟

LEAVE A REPLY

Please enter your comment!
Please enter your name here