في الوقت الحالي أغلب البراندات بقت بتستخدم ال Chatbot وكل يوم بيزيد الاعتماد عليه أكتر وأكتر، لإن من السهل جداً دلوقتي إنك في دقايق تعمل ال Chatbot بتاعك من غير أي مجهود وفيه أدوات مجانية كمان تساعدك في ده.

لكن الفكرة هنا مش مجرد إنك بتعمل ال Chatbot بتاعك وخلاص، ولكن المهم إنك تقدر تستغلّه بشكل صحيح في تطوير شغلك والتسويق للبراند بتاعك وزيادة القاعدة الجماهيرية ليك.

في المقالة دي هنتكلم عن 5 أفكار تقدر تنفّذها عشان تحسّن من أداء ال Chatbot للبراند بتاعك، وتضمن فعلاً إنه هيكون نقطة قوة بالنسبة لك مش نقطة ضعف تخسّرك جمهورك و عملائك الحاليين والمحتملين كمان….يلا بينا.

  • استخدم أقوى محتوى عندك

ال Facebook Messenger دلوقتي بقى من أكتر ال platforms اللي عليه إقبال وتردد كبير من الجمهور، عشان كده لازم تستغل ده بإنك تقدم للجمهور أفضل وأحسن محتوى عندك من خلال ال Facebook Messenger.

على الناحية التانية، لو كان كل همك هو الظهور كل شوية في وش العميل، و مهتمتش بالمحتوى اللي بتقدمه له فأنت بتعرّض البراند بتاعك لخطر كبير وهو إنك تفقد العميل ده للأبد لأنك هتكون في نظره مجرد متطفّل لازم يهرب منه.

  • سهّل الوصول لل Messenger من خلال موقعك

زي ما بتهتم إن موقعك يضم مفاتيح للوصول لقنواتك على السوشيال ميديا زي فيس بوك أو تويتر، لازم تهتم جداً بوجود مفتاح يوصل العميل لل Messenger بتاعك.

بالطريقة دي هتقدر تحوّل كمية كبيرة من الجمهور اللي بيزورك على موقعك على ال Chatbot اللي إنت نفّذته على الـ messenger، وكمان هتقدر تقييس وتتابع نشاط الجمهور ده بدقة من خلال طرق كتير.

  • ضيف ال Messenger بتاعك في ال Emails

بنفس المنطق اللي اتكلمنا عنه في النقطة اللي فاتت، تقدر تحوّل كمية كبيرة من الجمهور اللي متابعك من خلال الـ Emails ، وتخلّيه يتعامل مع البراند بتاعك من خلال ال Chatbot الموجود على الـ Messenger.

كل اللي هتعمله إنك في نهاية كل Email وإنت بتضيف قنواتك على السوشيال ميديا، تتأكد انك ضفت الـ Messenger معاهم، عشان تستفيد من الجمهور اللي متابعك على الـ Emails.

  • استخدمه ف اعلانات Click-to-Messenger

بالنسبة للفيس بوك بالذات، الإعلانات بقت أكتر دقة من الأوقات اللي فاتت، عشان كده هيكون مفيد جداً ليك إنك تستخدمها في استهداف الجمهور بتاعك.

ممكن تستهدف الجمهور اللي إنت محتاجه من خلال إنك تستخدم إعلانات “click to messenger” وده معناه انك هتوجّه العميل مباشرة إلى الـ messenger وتخلّيه يتعامل مع ال Chatbot اللي صممته.

  • استخدم ال Discovery Tab

خاصية الـ Discovery Tab موجودة حالياً في الولايات المتحدة الأمريكية وبس، ولكنها ممكن تكون موجودة على مستوى العالم في الشهور الجاية.

خاصية الـ Discovery Tab هتقدر تظهرك لعميلك اللي فعلاً بيدوّر عليك من خلال البحث على الفيس بوك.

عشان فيس بوك يساعدك من خلال خاصية الـ Discovery Tab لازم توفّرله شوية معلومات عامة عن نشاطك، وعن اللغة اللي بتتكلم بيها وعن المجال أو المجالات اللي بيشّملها البراند بتاعك بدقّة.

دول كانوا 5 أفكار تقدر بيها إنك تستخدم ال Chatbot بشكل أفضل، لو عندك افكار تانية ممكن تقولنا عليها؟

LEAVE A REPLY

Please enter your comment!
Please enter your name here