السوشيال ميديا

ناس كتير من اللي بيسوّقوا شغلهم أون لاين بيشوفوا إن عمل جروب على الفيس بوك شئ قديم و غير مجدي بالمرة، وشايفين إن الوقت والمجهود اللي هيضيعوه مع جروب الفيس بوك يستغلوه أحسن في حاجات تانية زي الصفحات مثلاً وده للأسف مش صح.

خلينا نقول إنه وفقاً لبعض الأبحاث، فإن جروبات الفيس بوك في حالة التركيز عليها بشكل كويس، هتكون فعّالة أكتر بكتير من صفحات الفيس بوك وده على عكس المتوّقع من أغلب الناس اللي بتشتغل تسويق أون لاين، واللي بتركّز كل اهتمامها على صفحات الفيس بوك وتهمل الجروبات.

في المقالة دي هنتكلم عن ازاي تستغل جروبات الفيس بوك فى إنك تسوّق لنفسك ولشغلك بشكل قوي وتتفاعل مع جمهورك المستهدف بطرق أحسن عشان تحقق النتايج اللي إنت محتاجها …..يلا بينا.

قبل ما نتكلم عن موضوع المقالة الأساسي، لازم نسأل سؤال مهم جدا….. هو إيه أهمية  إني أعمل جروبات الفيس بوك أصلا؟

فيه أسباب كتير ممكن تخلينا نتفق على أهمية عمل  جروبات الفيس بوك في شغلك أون لاين…لكن خلينا نتكلم عن شوية أسباب منها:

  • الجروبات بتخلق مجتمع علاقته قوية

من أهم مميزات الجروبات إنها بتخلق مجتمع مترابط ومشترك في الاهتمامات والصفات إلى حد كبير جدا، وده معناه إنه العلاقة ما بين أفراد المجتمع ده بتكون قوية مع الوقت وبيكون مجتمع متماسك وقريب من بعضه وقريب منك كبراند أو شخص صاحب الجروب

من خلال ترابط المجتمع ده هيكون فيه فرصة كبيرة لتبادل الخبرات والتجارب والآراء سواء ما بينك وبين الأعضاء في الجروب، أو حتى ما بين الأعضاء ما بينهم وبين بعض.

عملية خلق المجتمع الخاص بيك ممكن تتم عن طريق الموقع بتاعك، ولكن الموضوع ده مرهق ومحتاج وقت ومجهود كبير وممكن فلوس كمان، عشان كده جروبات الفيس بوك ممكن تكون بديل قوي.

  • الجروب فرصة لتقديم قيمة أكبر للمستخدمين

ممكن تستخدم الجروب بتاعك على الفيس بوك في إنك تتناقش مع جمهورك في قضية معينة خاصة بشغلك، أو تاخد رأيهم في عرض أو منتج جديد بتفكر تنزّله السوق قريب.

الجروبات تعتبر ساحة للنقاش وإضافة المعلومات والتفاصيل اللي ممكن متقدرش تقدمها بأي طريقة تانية إلا في مناقشات الجروبات دي على الفيس بوك.

الخصوصية

من مميزات الجروبات على الفيس بوك إنك ممكن تخلق خصوصية للمجتمع بتاعك ودي حاجة مهمة جدا لبعض الناس، يعني مناقشاتكم وآرائكم اللي بتنزل على الجروب هتكون خاصة بيكم وبس، ومحدش برا الجروب يقدر يشوفها وده هيكون فيه شئ من الأريحية للأعضاء.

ممكن تعمل ده من خلال إنك تعمل الجروب بتاعك خاص أو سري، وفي كل الأحوال دي هتكون متحكّم في الأعضاء اللي هينّضموا للجروب وكمان هيكون محتوى الجروب منحصر ما بين الأعضاء وبس.

  • التغلب على اللوغاريتمات

في السنين الأخيرة أداء الفيس بوك اتغيّر كتير، وحصل تطوير في اللوغاريتمات الخاصة بالفيس بوك وده خلّى الظهور في الصفحة الرئيسية شئ صعب لأغلب البراندات من غير ما تلجأ لحل الإعلانات المدفوعة على الفيس بوك.

لكن ممكن تتغلب على لوغاريتمات الفيس بوك عن طريق عمل جروب قوي، التفاعل والمشاركة المستمرة على الجروب هتخلّيه دايما حاجز مكانه في الصفحة الرئيسية للأعضاء الموجودين فيه ومتفاعلين مع المحتوى اللي بتقدّمه فيه.

طيب دلوقتي إحنا اخدنا فكرة معقولة عن أهمية استغلال الجروبات على الفيس بوك….المفروض دلوقتي نعرف ازاي نستغل الجروبات دي بشكل احترافي عشان نوصل للي إحنا عايزينه وده اللي هنتكلم عنه في النقط الجاية:

  1. حاول تملا كل البيانات المطلوبة قبل ما تنشر الجروب بتاعك على الفيس بوك، وده شئ مهم جدا للأعضاء وللفيس بوك نفسه عشان يقدر يصنّفك ويظّهرك بشكل سليم للجمهور بتاعك.
  2. لازم تنشر المحتوى بانتظام، يعني مينفعش إنك تنشر الجروب بتاعك وتسيبه فاضي أو تنشر محتوى فيه كل فترة، لإن ده مش في مصلحتك وهيكون الجروب بتاعك واحد من مئات الجروبات اللي ملهاش أي أهمية بالنسبة للأعضاء.
  3. وضّح كل حاجة خاصة بالقواعد والسياسات المتعلّقة بالجروب، وده عشان تضمن إنه ميحصلش أي مشكلة أو لبس ملوش لازمة ما بين الأعضاء.
  4. اهتم إنك تنشر محتوى خاص بالجروب، يمكن ده شئ صعب خصوصا لو كنت شغال على كذا براند أو كذا جروب، ولكنه شئ مهم جدا وممكن تستعين بأي أداة للنشر بالنيابة عنك.

دلوقتي احنا اتكلمنا عن أهمية جروبات الفيس بوك وازاي تقدر تستغلّها في شغلك أون لاين عشان تحقق نتايج قوية…..يا ترى هتبتدى امتى تشتغل على الجروب بتاعك؟

LEAVE A REPLY

Please enter your comment!
Please enter your name here