مقالة قوية

عملية إنتاج مقالة قوية وملّهمة شئ صعب جداً، ومش أي حد يقدر يعمله بالكيفية وبالشكل المرغوب فيه.

في المقالة دي هنتكلم عن الأسلوب اللي ممكن تتبعه في عملية كتابة المقالة بتاعتك عشان تكوّن مقالة قوية وجذّابة وتحقق الغرض منها وسط جمهورك….يلا بينا.

دوّر على الفكرة

قبل ما تبتدي تكتب أي حاجة في مقالتك الجديدة،

أكيد إنت عارف الموضوع الرئيسي اللي هتتكلم عنه زي مثلاً الديجيتال ماركتنج ده موضوع عام وواسع جداً.

بعد ما تعرف الموضوع العام اللي هتندرج تحته مقالتك،

دلوقتي لازم تحدد الموضوع أو الفكرة اللي هتدور حواليها المقالة بتاعتك.

فيه طرق وأدوات كتير ممكن تساعدك في إنك تلاقي فكرة جديدة ومختلفة للمقالة بتاعتك زي ما قولنا في مقالة سابقة،

ومن ضمن الأدوات اللي ممكن تستخدمها في إنك تلاقي فكرة جديدة ومختلفة لمقالتك موقع Quora أو تطبيق Feedly.

دلوقتي إنت معاك الموضوع العام للمقالة، وكمان الفكرة الرئيسية اللي هتتكلم عنها في المقالة فأنت جاهز للخطوة الجاية.

أكتب كل اللي جواك

في الخطوة دي هتكون دماغك مزحومة جداً بالكلام والأفكار الكتير اللي جواها،

كل مهمتك دلوقتي إنك تنزّل الأفكار والكلام ده كله قدامك على الورق من غير تفكيّر في الشكل أو المضمون اللي هيطّلع.

إقرا…وبعدين إقرا….وفي الآخر إقرا تاني

أيوة بالظبط كده، إنت دلوقتي خلصت المقالة بتاعتك بكل الأفكار والكلام اللي كان في دماغك وعاملّك دوشة وصداع،

لازم دلوقتي تبتدي تقرا اللي انت كتبته مرة واتنين وتلاتة.

كل مرة هتقرا فيها المقالة هتكتشف حاجات غريبة مشوفتهاش في أول مرة،

هتلاقي كلمات مكتوبة غلط أو أخطاء نحوية أو أسلوب مش مناسب،

وهتلاقي نفسك بتعدّل كتير أوي في الشغل بتاعك لحد ما توّصل لدرجة كبيرة من الرضا عنه.

أنشر مقالتك

سواء كان النشر على الموقع بتاعك أو البلوج أو السوشيال ميديا،

فأنت دلوقتى جاهز بعد تعديل وتنقيح مقالتك إنك تنشرها مع جمهورك اللي مستنّيك.

تابع وتفاعل مع جمهورك

أهم وآخر مرحلة في كتابة أو إنتاج مقالة جديدة، هي المتابعة والتفاعل مع الجمهور سواء على الموقع أو السوشيال ميديا.

أكيد بعد نشر المقالة هيكون عند جمهورك رأيه الخاص فيها، وشوية تساؤلات حوالين موضوع المقالة ومحتاجك ترد عليه وتكلّمه.

ناس كتير بتهمّل المرحلة دي وتكتفي بنشر المقالة وخلاص، وللأسف ده بيضيّع عليها فرصة كبيرة في زيادة التفاعل والتقارب ما بينها وبين جمهورها اللي بيحسّ بعد التقدير وقتها.

أمتى آخر مرة كتبت مقالة جديدة؟

LEAVE A REPLY

Please enter your comment!
Please enter your name here